ఒకే వాట్సాప్​లో రెండు అకౌంట్స్​

How to Use Multiple Accounts in Whatsapp: మీరు వాట్సాప్‌లో మల్టిపుల్ అకౌంట్స్ వినియోగించాలనుకుంటున్నారా? ఇందుకోసం క్లోన్ యాప్​లు లేదా ఫేక్ అకౌంట్స్​ వాడాల్సిన పని కూడా లేదు. ఒకే ఫోన్​లో ఒకే వాట్సాప్​​లో రెండు అకౌంట్స్​ నిర్వహించుకోవచ్చు. ఆండ్రాయిడ్ డివైజ్​లలో వాట్సాప్‌ మల్టిపుల్ అకౌంట్స్​ను వినియోగించుకునే వెసులుబాటు ఉంది. అంటే ఒకే ఆండ్రాయిడ్ డివైజ్​లో ఇప్పటికే ఉన్న వాట్సాప్​కు మరో అకౌంట్​ను యాడ్ చేసుకుని వినియోగించుకోవచ్చు. త్వరలో ఈ ఫీచర్​ ఐఫోన్ డివైజ్​లలోకి కూడా అందుబాటులోకి వస్తుంది. ఇకపోతే మీ వద్ద ఆండ్రాయిడ్ డివైజ్​లు ఉంటే ఈ ఫీచర్​ను ఎలా వినియోగించుకోవాలో తెలుసుకుందాం రండి.

మరొక వాట్సాప్​ అకౌంట్​లోకి లాగిన్ అవ్వడం ఎలా?:

• ఇందుకోసం మొదట వాట్సాప్​ ఓపెన్ చేసి కుడి వైపున ఉన్న మూడు-చుక్కలతో ఉన్న నిలువు ఐకాన్​పై క్లిక్ చేయండి.
• ఆ తర్వాత ‘Settings’ ఆప్షన్​లోకి వెళ్లండి.
• దాని లోపల పైభాగంలో మీ పేరు పక్కన ప్లస్ (+) గుర్తు కన్పిస్తుంది. దానిపై క్లిక్ చేయండి.
• ఇప్పుడు ‘Add Account’ అనే ఆప్షన్​ను కన్పిస్తుంది. దానిపై ట్యాప్ చేసిన తర్వాత ‘Agree and continue’ ఆప్షన్​ కన్పిస్తుంది. దానిపై క్లిక్ చేయండి.
• ఆ తర్వాత మీరు మీ రెండవ వాట్సాప్​ అకౌంట్​ ఫోన్ నంబర్‌ను ఎంటర్​ చేయండి.
• ఇలా చేసిన తర్వాత మీ స్క్రీన్‌పై వెరిఫికేషన్ పేజ్ ఓపెన్ అవుతుంది. ఇప్పుడు దానిలోని ‘Continue’ ఆప్షన్​పై క్లిక్ చేయండి. ఆ తర్వాత మీకు వాట్సాప్​ నుంచి వెరిఫికేషన్​ కాల్ వస్తుంది. వెరిఫికేషన్ కోసం మీరు ఇతర ఆప్షన్​లను కూడా ఉపయోగించవచ్చు. దాని కోసం మీరు ‘Verify another way’ ఎంపికను ఎంచుకోవాలి. తర్వాత ‘Missed Call’ కాకుండా మీకు ‘SMS’, ‘Voice Call’ స్వీకరించే ఆప్షన్​ లభిస్తుంది. మీరు ఈ మూడు ఎంపికలలో దేనినైనా ఎంచుకోవచ్చు.
• ఆ తర్వాత మీరు మీ పేరు, ప్రొఫైల్ పిక్చర్ వంటి దశలను కంప్లీట్ చేసి మీ వాట్సాప్ అకౌంట్​ను సెటప్ చేసుకోండి. తర్వాత మీరు ‘Next’ ఎంపికపై క్లిక్ చేయండి.
• అంతే ఇక మీరు మీ ఒకే డివైజ్​లో మరో వాట్సాప్​ అకౌంట్​ను వినియోగించుకోవచ్చు.
• అయితే ప్రస్తుతానికి ఒక డివైజ్​లో గరిష్ఠంగా రెండు వరకు అకౌంట్స్​ను మాత్రమే వాట్సాప్​లో ఉపయోగించుకునే సదుపాయం ఉంది.

ఐఫోన్‌లోకి కూడా!: పైన పేర్కొన్న ఈ స్టెప్స్​ను ఫాలో అయిన తర్వాత ఎటువంటి క్లోన్ యాప్ లేకుండా ఒకే పరికరంలో ఒకటి కంటే ఎక్కువ వాట్సాప్ అకౌంట్​లను ఉపయోగించుకోవచ్చు. అయితే ఇప్పటివరకు ఈ ఫీచర్ ఆండ్రాయిడ్ డివైజ్​లకు మాత్రమే అందుబాటులో ఉంది. అయితే ఇప్పుడు WabetaInfo తాజా నివేదిక ప్రకారం ఈ ఫీచర్ త్వరలో ఐఫోన్‌లోకి కూడా అందుబాటులోకి రానుంది.